TAUYAVU MAI NAMATAKULA

E na 1953, e na dela ni nona idavodavo ni tauvimate mai Tamavua, e raica kina na raivotu ni veikacivi e dua na turaga qaqa ni Dawara, Wailevu mai Cakaudrove.

“Kauta na itukutuku vinaka ki Korovisilou kei Namatakula,” oqori na domo ni veitalai ka rogoca matata ko Bro. Nemani Lagilagi.

E a ciqomi Jisu ko Nemani Lagilagi me nona ivakabula e na nodra dau veisiko tiko yani na noda lewe ni lotu taumada, e na dela ni nona idavodavo ni tauvimate mai Tamavua.

“O koya mo dou qai lako ka vakalotutaki ira na lewe ni veivanua kecega …..,”. Oqo na ikalawa ka taura tarava ko Bro. Nemani Lagilagi, e na imatai ni gauna me vodoka kina na basi ki na Yasayasa Vaka-Ra, me sa vakasaqarai ko Korovisilou kei Namatakula.

E a veivakamoceri na tavaladelade ni basi e na kena cicivi tiko na gaunisala qereqere ka dau muri tu e na gauna koya. Qai dua na nona yadra kidacala mai, sa sivi ko Korovisilou ka sa udu sara tu ga na basi e na mua ni koro ko Namatakula, vaka ki Sigatoka.

E a ciqomi koya ena nona itikotiko ko Asesela Soqo, e dua na lewe ni koro ko Namatakula. Tekivu sara na caka lotu kei na veimasulaki.

Yavalati Namatakula na cakacaka mana kei na kena vunautaki na vosa, ka yaco na soli bula ka vakadeitaki sara na bula ni veiqaravi.

E dua na cauravou ni Dreketi mai Macuata, ka dua vei ira na imatai ni lewe ni lotu, e a soli bula e na gauna ko ya. E kaya na kena italanoa, ni dau davo mocemoce koto ko koya ni vodoki koya tu na yaqona ni Viti, e qai dau masulaki koya ko Bro. Nemani Lagilagi ka nona qaqa ni masu “Turaga, na turaga oqo me sosomitaki au eke, e na kena qaravi na cakacaka.” E qai yaco mevaka kina.

Oqori na italanoa kei Talatala Qase Erami Kabuyawa, Dreketi, Macuata; na turaga iTalatala ka qai veiqaravi mai Namatakula.

Sai ira oqo na iTalatala ka qai veiqaravi mai e na veitabayabaki mai ki muri:-

o Talatala Lagilagi (Yasawa)

o Talatala Voseci Tamata

o Talatala Iliesa Sanimo (Nadroga)

o Talatala Asaeli Neiti (Nadroga

o Talatala Aca Simolo (Tailevu)

o Talatala Sunia Boila (Tailevu)

o Talatala Eremasi Batibasaga (Namatakula)

o Talatala Asaeli Turagadrau (Namatakula) na turaga ka sa qarava tiko na cakacaka ni kua.

E a qai rejisitataki na i Soqosoqo Lotu oqo e na 1966.

E sa yabaki 54 ni kua na cakacaka mai Namatakula, ka sa yabaki 41 mai na gauna ka rejisitataki kina.

E se bula tikoga ni kua ko Talatala Qase Erami Kabuyawa ka sa laki tauyavutaka sara na cakacaka mai Cikobia. E se bolea tikoga na veiulunivanua, dina ni sa matua sara na bula.

Oqori na italanoa kei Namatakula AOG e Navosa, na i Soqosoqo Lotu e sa levu sara na Turaga kilai era mai lotu kina, vakauasivi vei ira ka rogo e na rara ni qito.

Sa na mai guilecavi beka na yacai Nemani Lagilagi, Dawara, Wailevu, Cakaudrove; ia e na mata ni Kalou, e ceuti e na qeteqete ni ligana ka dau nanuma kina.

VINAKA NAMATAKULA!!

NOTE:

Kevaka e tu eso na italanoa se tukuniyalo vakaoqo, e rawa ni vakau mai ena email :- lftmedia@kaiviti.com; ka rawa ni dau tabaki ena mona livaliva oqo.

E vuqa na italanoa vakaoqo e sa guilecavi e na vuku ni noda vakaweleweletaka na itaba tamata ka bula tiko edaidai.